Hvernig fannst þér fyrirlesturinn?

4. október 2006 15:38 (2 lesendur hafa sagt álit sitt.)

Formleg opnun við Fjölbrautaskólann í Garðabæ

Í dag 5. október, verður formleg opnun á fyrirlestraverkefninu Það eru forréttindi að lifa með fötlun við Fjölbrautaskólann í Garðabæ.  Þar munu flytja ávörp Þorgerður Katrín Gunnarsdóttir menntamálaráðherra, Magnús Stefánsson félagsmálaráðherra og Þorsteinn Þorsteinsson skólameistari Fjölbrautaskólans í Garðabæ.  Einnig mun ég greina frá aðdraganda og markmiðum verkefnis.

Undirbúningur hefur verið í fullum gangi síðastliðinn mánuð en er nú allt að verða klappað og klárt, að minnsta kosti er ég tilbúin í slaginn.  Ég hlakka mikið til að hefja verkefnið og efast ekki um að þetta verði mikil og góð lífsreynsla fyrir mig og aðra.  Með jákvæðri nálgun er markmið mitt að opna heim fólks með fötlun og heimsækja framhaldsskóla landsins með fræðslu byggðri á raunveruleikanum, eigin reynslu og upplifun.  Fræðslan er annars vegar ætluð nemendum og hins vegar starfsfólki framhaldsskóla.

Frekari fréttir af verkefninu, myndir og aðrar gagnlegar upplýsingar um málefni fatlaðs fólks munu koma inn á vefinn innan fárra daga og vera stöðugt í þróun.

Ég þakka öllum þeim styrktaraðilum sem hafa lagt verkefninu lið, ásamt öllu því frábæra fólki sem hefur unnið með mér og hvatt mig áfram með fræðsluna.  Þið hafið lagt mikið að mörkum til að láta Það eru forréttindi að lifa með fötlun verða að veruleika.

Fyrsti fyrirlestur verður haldin á mánudaginn 9. október fyrir nemendur Fjölbrautaskólans í Garðabæ.

Hlakka til að sjá ykkur FG!!

Kv.

Freyja Haraldsdóttir

Til baka

Yfirlit frétta